Grazas por axudarnos a mellorar o Mundo de Milu!!

Co gallo do Día Internacional da Familia, 15 de maio, queremos agradecervos a participación na proposta “Axúdanos a mellorar o mundo de Milu” a todos os colexios, a todos os profesores e profesoras e, sobre todo, a todos os nenos e nenas.
Desde o principio do curso, fostes 148 os colexios que vos apuntastes a traballar a iniciativa, implicando para iso a 518 profesores e profesoras, e a 10.122 nenos e nenas de toda Galicia.

Como sabedes, a proposta incluía, para aqueles que o quixeran, a posibilidade de participar nun Concurso que recollera as propostas e ideas para “mellorar o mundo de Milu”. Xa dixemos entón que o que nos interesaba era a Participación, polo que todos os centros participantes recibiredes un pequeno agasallo, o mesmo para todos.
Ademais diso, queremos recoller polo miúdo as vosas ideas, para o que imos traballar na elaboración dun libriño que seleccione algúns dos traballos, e que publicaremos a inicios do curso que vén. Farémolo chegar a todos os colexios participantes. Tamén nesta web teremos dispoñible para entón unha selección deses traballos.
Así mesmo, estudaremos con atención as propostas específicas para mellorar este portal Web, e intentaremos introducilas todas, na medida na que os nosos recursos o permitan.

Mentres tanto, queremos facer un pequeno recoñecemento a todos os colexios que, a día de hoxe, tedes confirmada a vosa participación no concurso, así coma a todos os que vos apuntastes á proposta, independentemente do resultado dese traballo.
Moitas grazas por axudarnos a mellorar o Mundo de Milu!!